Buryango siporo nubuzima Abanya-Kigali bazindukiye muri ‘Car Free Day’ yahujwe no kwishimira Shampiyona y’Isi y’Amagare -AMAFOTO meza

  

Abatuye mu Mujyi wa Kigali bazindukiye muri siporo rusange, izwi nka ‘Car Free Day, yahujwe no gutwara amagare (Special Ride) mu kwishimira Shampiyona y’Isi y’Amagare ya 2025 yabereye i Kigali.

Nk’uko bisanzwe buri nshuro ebyiri mu kwezi habaho siporo rusange mu Mujyi wa Kigali, igahuriza hamwe abawutuye mu turere dutatu tuwugize.

Kuri iki Cyumweru tariki ya 5 Ukwakira 2025 abitabiriye iyi siporo bahuriye mu mihanda isanzwe ikoreshwa, ikaba yitabiriwe n’Ingeri zose zirimo n'Abayobozi nka Minisitiri wa Siporo, Nelly Mukazayire n'Umuyobozi w'Umujyi wa Kigali, Samuel Dusengimana.

Siporo y’uyu munsi wari umwihariko dore ko yaranzwe no gutwara amagare mu kwishimira Shampiyona y’Isi y’Amagare ya yabereye i Kigali kuva tariki ya 21 kugeza tariki ya 28 Nzeri 2025. Uretse gukora siporo, abayitabiriye kandi baboneyeho umwanya wo kwipimisha indwara zitandukanye ziganjemo izitandura nk'uko bisanzwe bikorwa.

Iyi Siporo ituma abatuye Umujyi wa Kigali bagira ubuzima bwiza. Ubushakashatsi buheruka gukorwa n’impuguke mu kurengera ibidukikije bwerekanye ko umunsi wahariwe siporo rusange (Car Free Day) ikorwa inshuro 26 buri mwaka i Kigali, izafasha mu kugabanya 20% by’ingano y’imyuka ihumanya ikirere mu gihe cy’imyaka itanu uhereye mu 2021 kugeza mu 2025.

Ubu bushakashatsi bukomeza bugaragaza ko muri izo nshuro 26 za siporo rusange, ubuzima bw’abagera ku 100 buzabungabungwa bitewe n’uko hari inshuro zigera kuri 600 bari kuzivuzamo baramutse badakora iyo siporo. Ni mu gihe Igihugu cyo kizazigama agera kuri miliyari 160 Frw yari kuzagenda mu bikorwa binyuranye byo kuvuza abantu izo ndwara.

Minisitiri wa Siporo n'Umuyobozo w'Umuiyi wa Kigali mu bitabiriye 'Car Free Day’