Rayon Sports yaguye miswi na Gasogi United ikomeza kugana ahabi 2-2 /

 

Ikipe ya Rayon Sports yaguye miswi na Gasogi United mu mukino wo ku munsi wa Gatatu wa shampiyona y’icyiciro cya mbere mu Rwanda ya 2025/2026 wakinwe kuri iki Cyumweru saa Cyenda kuri Kigali Pele Stadium.

Uko umukino wagenze umunota ku munota;

Undi mukino wo ku mumsi wa gatatu wa shampiyona wakinwe Gicumbi yatsinze Amagaju ibitego 2-0 mu gihe mu kanya guhera saa kumi Nebyiri n'iminota 30 ho Police FC irakira AS Muhanga.

Uyu ubaye umukino wa Kane w'ikurikiranya Rayon Sports itabasha kubona intsinzi. Yahise ijya ku mwanya wa karindwi ku rutonde rwa shampiyona n'amanota ane mu gihe Gasogi United yo iri ku mwanya wa kane n'amanota atanu.

Umukino urangiye amakipe yombi anganya ibitego 2-2.

90+2' Gasogi United ikoze impinduka mu kibuga havamo Hakim Hamiss hajyamo Udahemuka Jean De Dieu

90+1' Umunyezamu wa Gasogi United,Cuzuzo Aime Gael aryamye hasi ari kwitabwaho n'abaganga

Umusifuzi wa kane yongeyeho iminota ine

89' Hakim Hamiss wa Gasogi United yaratsinze igitego cya gatatu ariko umusifuzi asifura kurarira

85' Rayon Sports ibonye koroneri ku mupira waruzamukanywe na Mohamed Chelly agiye kuwuhindura imbere y'izamu birangira myugariro wa Gasogi United awurengeje ariko n'ubundi nta cyo itanze 

80' Gasogi United ikoze impinduka mu kibuga havamo Kokoete Udo hajyamo Muhindo Collin 

78' Harerimana Abdoulaziz yongeye kugerageza kurekura ishoti ari inyuma y'urubuga rw'amahina ariko rinyura hejuru y'izamu kure

74' Cuzuzo Aime Gael atabaye Gasogi United ku mupira waruzamuwe na Bigirimana Abedi ashaka abakinnyi bari imbere y'izamu ariko arazamuka awukuraho 

73'Mohamed Chelly yeretswe ikarita y'umuhondo nyuma yo kutishimira icyemezo cy'umusifuzi 

70' Marc Nkubana azamuye koroneri ubundi Kokoete Udo arihundukiza arekura ishoti ariko rinyura hejuru y'izamukure

68' Nkubana Marc atabaye Gasogi United akura umupira kuri Tambwe Gloire mu rubuga rw'amahina

66' Afhamia Lotfi akoze impinduka mu kibuga havamo Rushema Chris hajyamo Serumogo Ally Omar

61' Myugariro Rushema Chris atabaye Rayon Sports akuramo igitego cyari cyabazwe

59' Gasogi United ikoze impinduka mu kibuga havamo Dany Ndikumana hajyamo Niyonkuru Elissa

57' Kokoete Udo wa Gasogi United akoreweho ikosa na Ndayishimiye Richard hatangwa kufura itagize icyo itanga 

53' Rayon Sports ibonye igitego cyo kwishyura

Harerimana Abdoulaziz atsinze igitego cya kabiri ku mupira waruhinduwe imbere y'izamu na Sindi Paul Jesus umusanga aho yari ahagaze ku nguni yo hepfo awushyira mu nshundura

49'  Nshimiyimana Emmanuel 'Kabange' ahinduye umupira  usanga Mohamed Chelly agiye kuwuhindura imbere y'izamu myugariro wa Gasogi United awukuramo

46' Rayon Sports ije ikora impinduka mu kibuga havamo Ntarindwa Aimable,Tony Kitoga na Aziz Bassane hajyamo Mohamed Chelly,Harerimana Abdoulaziz na Ishimwe Fiston

Igice cya mbere kirangiye Gasogi United iyoboye n'ibitego 2-1

Igice cya mbere cyongeweho iminota ibiri

44' Rayon Sports irase uburyo bwashoboraga kuvamo igitego ku mupira Tambwe Gloire yari abonye arekura ishoti gusa rinyura hepfo y'izamu

38' Muri iyi minota umukino uratuje aho Rayon Sports ariyo ifite umupira gusa ikaba yabuze aho imenera

35' Bigirimana Abedi yari acomekeye umupira Aziz Bassane ariko Cuzuzo Aime Gael asohoka neza awukuramo

33' Gasogi United irimo irarusha Rayon Sports guhererekanya neza

29' Gasogi United itsinze igitego cya kabiri

Ikipe ya Gasogi United itsinze igitego cya kabiri ku mupira warutakajwe n'abakinnyi ba Rayon Sports ubundi usanga Kokoete Udo arekura ishoti riremereye ari inyuma y'urubuga rw'amahina riruhukira mu nshundura

23' Danny Ndikumana azamukanye umupira acenga awuhinduye imbere y'izamu ushyirwa muri koroneri itagize icyo itanga

21' Nyuma yo kwishyurwa Murera irimo irashaka uko yabona igitego cy'intsinzi,Sindi Paul Jesus azamuye umupira yinjira mu rubuga rw'amahina arekura ishoti gusa rinyura imopande y'izamu gato

16' Gasogi United ibonye igitego cyo cyo kwishyura gitsinzwe na Ngono Guy Herve ku mupira waruvuye muri koroneri ubundi akozaho agatsi

9' Koroneri ya Rayopn Sports,Aziz Bassane yari azamukanye umupira neza ageze mu rubuga rw'amahina Nkubana Marc awumukuraho arawurenza 

7' Rayon Sports yari ibonye igitego cya kabiri,Tambwe Gloire yongeye kubona umupira mwiza mu rubuga rw'amahina akisuganya ngo arekure ishoti Cuzuzo Aime Gael ahita atabara ashyira umupira muri koroneri itagizi icyo itanga

5' Rayon Sports ifunguye amazamu

Ikipe ya Rayon Sports ifunguye amazamu  ku gitego cya Tambwe Gloire ahaw umupira na Tony Kitoga 

3' Gasogi United niyo ifite umupira  aho irimo irahererekanya gake gake ishaka uko igera imbere y'izamu

1' Tambwe Gloire wa Rayon Sports niwe utangije umukino ashyira umupira inyuma ugera kwa Tony Kitoga azamura umupira muremure imbere gusa Nkubana Marc ahita awukuraho